МСМ Групп нь нийгмийн хариуцлага, олон талт байдал, хүртээмжийг дэмжих зорилгын хүрээнд Монголын Пара Усан Спортын Үндэсний Холбоотой хамтын ажиллагаагаа үргэлжлүүлж, пара тамирчин Ө.Мөнхтөрийн олон улсын тэмцээнд оролцох оролцоог дэмжлээ.

Энэхүү хамтын ажиллагааны хүрээнд МСМ Групп харааны бэрхшээлтэй пара тамирчин Ө.Мөнхтөрийн Герман улсын Берлин хотод зохион байгуулагдсан Пара усан спортын Дэлхийн цуврал тэмцээнд оролцохыг дэмжин ажилласан юм. Мөнхтөр тус тэмцээнд амжилттай оролцож, албан ёсны амжилтаа бүртгүүлэн олон улсын тамирчидтай амжилттай өрсөлдлөө.

Пара усан спортын Дэлхийн цуврал, Азийн наадам, Дэлхийн аварга зэрэг олон улсын томоохон тэмцээнүүдэд оролцох нь Паралимпын наадамд оролцох зорилготой тамирчдын хувьд онцгой ач холбогдолтой байдаг. Эдгээр тэмцээнүүд нь зөвхөн олон улсын туршлага хуримтлуулах төдийгүй албан ёсны чансаа, амжилтаа тогтоох, цаашдын спортын амжилтын чухал үе шат болдог.

Берлин хотод байх хугацаандаа Ө.Мөнхтөр мөн Red Bull Wings for Life World Run дэлхийн хамгийн том хандивын гүйлтэд оролцлоо. МСМ Групп нь энэхүү арга хэмжээг Монгол Улсад жил бүр зохион байгуулдаг бөгөөд нуруу нугасны гэмтлийн судалгааг дэмжих энэхүү олон улсын санаачилгыг компанийн нийгмийн хариуцлагын санаачилгуудтай уялдуулан ажиллаж байна.

Ө.Мөнхтөр нь усан спортоос гадна марафон гүйлт, шатрын төрлөөр идэвхтэй хичээллэж, дотоодын болон олон улсын тэмцээнүүдэд тогтмол оролцдог идэвхтэй тамирчин юм. Түүний тууштай байдал, сахилга бат, хичээл зүтгэл нь олон хүнд урам зориг өгсөөр байна.

МСМ Групп нь цаашид ч тэгш боломж, олон талт байдал, хүртээмжийг дэмжсэн санаачилгуудыг хэрэгжүүлж, Монголын пара тамирчдад илүү өргөн боломж, олон улсын тавцанд өөрсдийгөө сорих нөхцөлийг бүрдүүлэхэд хувь нэмрээ оруулахыг зорьж байна. Энэхүү хамтын ажиллагаагаар дамжуулан хүн бүр өөрийн боломжоо бүрэн дүүрэн ашиглах хүртээмжтэй нийгмийг цогцлоохыг дэмжин ажиллаж байна.